ПРЕТСЕДАТЕЛСКИОТ КАНДИДАТ НА ВМРО-ДПМНЕ, ЃОРГЕ ИВАНОВ КАТЕГОРИЧЕН

Македонија е дел од Европа

Проблемот со името е наследен од претходни генерации политичари, кои влегле во лавиринт, од кој сега не знаат како да излезат, вели Иванов

Го промовирам концептот на еднаква отвореност и еднаква блискост со сите, не можеме да ги менуваме соседите и затоа треба да најдеме начин на живот со нив. Сите проблеми што ги имаме, а кои ни се оставени во наследство, бидејќи некои се стари со децении некои со векови, не смеат да ги оптоваруваат секојдневните односи меѓу обичните луѓе.

Политичарите треба да се зафатат и тие проблеми да ги решаваат, а секојдневниот живот треба да се продолжи како што доликува на соседи. И во нашата традиција се вели, ако портата со соседот е затворена, капиџикот мора да е отворен, вели Ѓорге Иванов, претседателски кандидат на ВМРО-ДПМНЕ во интервју за радио Дојче Веле. Одговарајќи на прашањето дали е оптимист дека за време на оваа генерација ќе може да се реши спорот со името Иванов вели:
- Јас доаѓам од академската заедница, каде проблемите сме ги согледувале долго, долго на теоретско ниво и во историјата на меѓународните односи такви проблеми не се решаваат, меѓутоа се наоѓа начин да се живее со тој проблем и да се постигне некој компромис кој нема да биде на штета ни на едната ни на другата страна. Тоа е еден мачен и долг пат за наоѓање на заеднички решенија, меѓутоа ако се посветиме на тоа успехот ќе дојде. Тој проблем е наследен од претходни генерации политичари, кои влегле во лавиринт, од кој сега не знаат како да излезат.

На првиот митинг истакнав дека доколку бидам избран ќе направам промена на тој однос, ќе инсистирам по секоја цена да се подготви, да се организира средба на врвот меѓу претседателот на Република Македонија и претседателот на Република Грција, за да се испрати сигнал на добра волја и сигнал до обичните луѓе. Иванов укажува дека Македонија нема друга алтернатива, освен ЕУ и НАТО. "Македонија е дел од Европа, од европскиот простор. Македонија има потреба од НАТО. Тоа е нашата генерална стратешка определба. Од тоа ние не отстапуваме. Меѓутоа блокадите што ги имаме кон тој процес укажуваат на тоа дека се соочуваме со Алијанса во која не е изграден консензусот. Она што Македонија го доживува со еден од своите соседи сега станува пречка за интегрирање на целиот регион", вели Иванов.

ВМРО-ДПМНЕ ПРЕД КОЧАНЦИ
Иванов: Сплотени во НАТО и ЕУ
Коалицијата "За подобра Македонија" предводена од ВМРО-ДПМНЕ во вторникот вечерта на митинзи во Кочани и во Виница ги претстави кандидатите за претседател на државата, за градоначалници и за советници.

Кандидатот за претседател Ѓорѓе Иванов пред кочанци рече дека Македонија треба да биде дел од ЕУ и НАТО, а тоа може да се постигне ако сите институции се сплотени, а не разидинети. На Македонија и треба човек што ќе обединува, а не разделува, нагласи Иванов. Во неговата програма приоритет е меѓународната политика, но и да биде блиску до граѓаните со отворање на народни канцеларии во повеќе градови.

- Се обидувам да го обновам наследството од покојниот претседател Борис Трајковски, голем човек со голема идеја и голем верник кој посвети особено внимание на дијалогот меѓу различните религии. Тие духовни дијалози треба да станат наше секојдневие, рече Иванов.